"ჩანდლერი" ამერიკული წარმოშობის ჯიშია, კალიფორნიაში ძირითად წამყვან ჯიშად ითვლება.
მცენარე საშუალო ზრდისაა, ახასიათებს ზემოთ მიმართული ვარჯი. ნამყენი მსხმოიარობას იწყებს დარგვიდან მე-3 წელს. ყვავილობის ტიპი პროტერანდრიულია, მსხმოიარობა - ლატერალური. სრულ მსხმოიარობას აღწევს დარგვიდან 8 წელში. მოსავლიანობა: 9-10 ტ/ჰა
ნაყოფები მოგრძო-ელიფსურია, დიდი ზომის (34X36 მმ), მასა 12,8-13,9 გრამი, კარგი სასაქონლო თვისებების. ნაჭუჭი თხელია, ადვილად მტვრევადი, ოდნავ დანაოჭებული. ნიგოზი თეთრია, მთლიანად ავსებს ნაჭუჭის ღრუს, გამოდის მთლიანად ან ნახევრებად, გემო - ნახევრად მოტკბო, გამოსავლიანობა 49-54%, ცხიმიანობა 64%.
ნერგები არის ერთწლიანი ნამყენები: 0,5მ და 0,8 მ-დე სიმაღლის, ორწლიანი ნამყენები - 1,2-1,5 მ. ბაღის გაშენება ხდება 5X6 ან 6X6 მეტრი კვების არეზე. 1 ჰა-ზე დაირგვება330 – 277 ძირი.
ჩანდლერის ერთ-ერთი საუკეთესო დამამტვერიანებელია ფრანკეტი. იგი წარმოადგენს შესანიშნავი გემური თვისებების მქონე ფრანგული ჯიშის კაკალს, რომელიც ბოლო 20-25 წლის განმავლობაში ფართოდ გავრცელდა ევროპაში და გამოიყენება როგორც უხვმოსავლიან, ასევე დამამტვერიანებელ ჯიშად. ჩვეულებრივ ბაღებში რგავენ ჩანდლერის ჯიშის 9-10 კაკლის ნერგთან ფრანკეტის ჯიშის კაკლის ერთ ნერგს. შედეგად მაღლდება როგორც მოსავლიანობა, ასევე კაკლის ხარისხი.
